Thonë se libri është miku më i mire i njeriut dhe sigurisht kjo nuk ka vend për diskutim. Po patjetër që ka nevojë për një vend të veçantë në shtëpi për të kaluar kohë me të. Ndaj ne po ndajmë me ju disa këshilla se si të mobiloni një kënd leximi.
Një ambient mikpritës
Çdo gjë duhet të jetë e e orientuar drejt komfortit dhe relaksit : kolltuku
komod, drita e ngrohtë, aksesorët e duhur që të ftojnë të bësh një pushim. Nuk
ka mënyrë më të mirë për t’u larguar nga jeta frenetike se sa leximi i librit
të preferuar në këndin perfekt.
Kolltuku perfekt
Harroni karrigen dhe divanin: ulësja ideale është kolltuku. Nuk ka rëndësi stili por mjafton që të jetë i butë dhe komod. Stilin dhe ngjyrën zgjidheni sipas pjesës tjetër të shtëpisë.
Dritë natyrale – Dritë artificiale
Ndriçimi
natyral është gjithmonë më i mirë, kështu që mundohuni që këndi të jetë afër
dritares apo ballkonit për të shfrytëzuar dritën gjatë ditës. Por sigurisht që
është i nevojshëm një ndriçues tokësor apo komodine për të lexuar në ditë me
shi apo gjatë natës.
Optimizimi i hapësirës
Nëse nuk keni shumë hapësirë, fare mire një cep të vogël të sallonit mund ta përshtasni në kënd leximi. Po ashtu edhe në dhomën e gjumit mund të improvizoni një kënd të vogël leximi, aty ku ndoshta do të jeni edhe më të përqendruar.
Librat
A do të kishte kuptim një kënd leximi pa rafte apo librari? Në varësi të
hapësirës mund të zgjidhni mobilje të ndryshme për vendosjen e librave. Por mos
harroni të luani me ngjyrat e kopertinave për ta mbushur ambientin me ngjyra.